ṬAWNGṬAI THILTIHTHEIHNA (PAULA LEH SILA ṬAWNGṬAINA)

TIRHKOHTE 16:25-26
Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a; tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawl bunte chu a lo inphelh ta vek a.

Paula Missionary zin vawi thumnaah ramhuai a hnawh chhuah thubuaiah Sila nên Philippi lung inah an khung a. Zan laiah ṭawngṭaiin hlate an sa a, lîr nasa tak lo nghîng chuan tân in mai bakah mi tângho kawl bunte pawh a tiphelh ta vek a. Tâng vengtu phei chu a pian thar phah ta nghe nghe a nih kha!

G.E. Rees-a chuan, “Pathian chu kan hnên aṭangin hla hle mah se, ṭawngṭainain leiah a rawn hruai a, a thiltihtheihna chuan min thlun zawm ṭhin,” a ti. Beidawnga kan awm lai te, kan tawrh mêk lai te leh kan mangan lai te pawhin kan ṭawngṭai nghâkin min lo ngaichâng reng ṭhin a ni. “Mangan ni chuan mi ko la, ka chhanhim ang che,” a ti a ni (Sam 50:15a).