KAWNGKA ZÎMAH

MATTHAIA 7:13-14
Kawngka zîmah chuan lût rawh u: boralnaa kalna kawngka chu a zau va, a kawng pawh a zau bawk a, chumi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêm tê an ni.

Kalna tûr kawng pahnih awmah a zâl nuam zâwk leh zau zâwk chu mi tam ber thlan a ni. A kal an tam avângin a dik tihna a ni lo. A hniak tam lam lam tih pawh hi a dik ber kher lo. Kawng zauva kalte chuan sual avângin phurrit an phur a, hlauh leh mangannain a tibuai a, an tâwpna chu boralna a ni.

Kawng dang leh chu kawngka zîm a ni a, he kawnga kalte chu Isuan an phur a phurh sak avângin an hahdam a, mahni inphatin ni tin kraws an pu thung. Isua zui hi kawng awlsam a ni lo va, harsatna leh tihduhdahnate tuar a ngai (2 Tim. 3:12). Isua hnung zui tûr chuan kawngka zîmah kan luh a ngai a, a tâwpna chu Nunna a ni.

Kawng awlsam a ni lo ve
Vânram kan panna kawng hi;
Hlîng tam tak awmna a ni e,
Mahse Chhandamtun min hruai,
Kawng bumboh te a ti rual zêl ṭhin.

Harsatna kârah pawh nunna kawng i zawh zêl ang u.