MUT THLAHLEL SUH 1-NA

THUFINGTE 24:33-34
I duh chuan mu hlek la, chhîng hlek rawh, Kut kuangkuahin châwl hlek teh; I mut hlânin i rethei hman ang a, Tlâkchhamnain sipai angin a nang thut ang che.

Kan Bible-in mut chungchâng a sawi hi pachhiatna lam te, thatchhiatna lam te leh hlawhchhamna lam te nên a sawi zawm tlângpui ṭhin a. Chutiangin zîng leh thawh hmâ lam a sawi hi thil ṭha leh hlawhtlinna lam nên a sawi zawm tlângpui bawk ṭhîn. Mut hi kham tak tak a har a ni mai thei, tho hma ṭhin ho ai hian tho tlai ṭhin hote hian mut an kham lo zâwk zêl.

Kan ramah mai pawh hian chhût ila. Tam tak hi chu nei lo tlâk kan ni ve hrim hrim. School naupang nih laia tho hma peih lote leh miin zîng taka thova hna an thawh mawlh mawlh laia mu tluk tluk ṭhin hote hi chuan pachhiat hi kan phû ve hrim hrimin a lang. “Buh seng laia inchhêk khâwl chu fapa fing a ni a, a seng hun laia muhil erawh chu fapa, mualphona thlen ṭhintu a ni” (Thuf. 10:5).