ENGKIMTITHEI LALPA

Sam 103:1
“Aw ka nunna, LALPA chu fak la; Ka kawchhunga awm zawng zawngte u, a hming thianghlim chu fak rawh u.”

‘Praise to the Lord, the Almighty’ tih hla Kristian Hla Bu No.10-na a mi hi Joachim Neander (1650-1680) phuah a ni a. Pathian fakna leh chawimawina hla ropui tak mai a ni a. A hla thu leh a thluk inlalawn chho pui tak mai hian Pathian a chawimawi chiang em em a ni.

Mahse he hla phuahtu hi nungchang dukdak lo tak nei thin, tlangval lai hmang ve tak mai a ni a. A thiante nen tumkhat chu Pastor Under-Eyke a thusawi ngaithla turin inkhawm an tum a, an tum dan tak chuan Pastor thusawi lai chu fiamthu thawh nan lo hman an tum hi a ni a. Chutia an han inkhawm takah chuan Pastor Under-Eyke-a chuan thu a sawi tha em em mai a. Neander-a rilru a khawih ta tlat mai a. Chuta tang chuan a nun khawlohna chu tlemin a nep ta deuh niin an sawi.

Vawi khat chu sa pelin ramhnuaiah a kal a, a um nasat em avangin a duh aia thui a kal ta a, khuain a thim hnan ta mai a. Khaw en lai kha chuan kham kar mah ni se a kal pel thei mai a, mahse khua a thim takah chuan tluk leh rah sual hlauhawmna hmunah chuan a ding ta reng mai a. Chutiang chuan dam khawchhuahna hmun awmin a inhre ta lo a. Neander-a chuan Pathian a au ta a, tichuan thlamuanna leh huaisenna nasa tak a nei a. A nunna chu zuah a ni ta a ni.

Neader-a nun hi a lungchhiatthlak ve em em a, a nun hmasa lam sawi tur em em a awm lo a. Chutia a pianthar hnua rawngbawlna kawnga ke a pen dawn tihin hrisel lohna hrang hrang ten a tlakbuak a. Kum 30 a nihin a thi ta mai a. German rama a zinkualna vela tlang leh phai leh luite avang chuan Pathian thilsiam ropuizia leh fak tlak a nihzia atangte pawhin a phuah chhuak niin an sawi. Pathianin Neandar-a chunga a thil tih mak takte chu amah ngei pawhin a beisei phak lohte an ni.

‘Engkimtithei Lalpa leh kan Pathian chu fak rawh u, Aw ka nunna, amah fak rawh, chhandamna min petu.’