THAWNTHU CHUL THEI LO

Hebrai 13:8
“Isua Krista chu niminah nen, vawiinah nen, kumkhua pawhin a pangngaiin a awm fo vang.”

‘Thawnthu hlui chu min hrilh rawh’ – KHB 339-na hi Miss Hankey (1834-1911) phuah a ni a. British Banker hlawhtling tak fanu a ni a. A hunlaia khawsa nuam ve tak chhungkua atanga lo seilian a ni nghe nghe. A naupan laiin an thenawm lawkah Bible class kalna a awm a, tah chuan bible a zir ve thin a ni.

Tichuan a phak ang tawkin rawngbawlna a hun neih dan ang zelin a hmang thin a. Mahse kum 30 bawr vel a nih chuan damlohna lian takin a rawn tlakbuak ta mai a. Daktawr chuan kum khat chhung teh meuh mai engmah tilova chawl hahdam turin a lo ti a. Hankey chuan hrehawm a ti em em a. A chhan ber pawh kum khat teh meuh mai Bible Class a pe thei lo tur kha a ni ber.

Kum khat dawn teh meuh han chawlh chu rawngbawlna kawnga mi thahnemngai tan chuan a rei duh hle ang. Chung hun chhung zawng chuan Hankey chuan Pathian a pawl thin a. Hla a phuah a, thu a ziak bawk a. He hla mawi leh nalh tak, ‘Thawnthu hlui chu min hrilh rawh’ tih hi a phuah ta a ni. Tin, hetih hunlai hian ‘I love to tell the story’ tih hla a phuah bawk.

Tichuan thla 10 a lo ral a, Pathian khawngaihna avangin a lo tho harh peih ve leh ta a. London-ah chuan a kir leh a, tah chuan a châk em em Isua chanchin zirtir chu a chhunzawm leh ta a ni.

Aw, Miss Hankey ang hian Isua chanchin leh a thawnthu hi sawi châk leh ngaithla châk reng ni ve thei ila, a va’n lawmawm dawn em. Mahse he khawvel thawnthu te hi sawi nuam kan lo ti ta hle mai. Hmuh châk leh sawi châk dangte hian Isua Kraws thu ngaihthlak min peih lo tir tial tial si chuan a va la pawi dawn em!.

He thawnthu hlui chul thei lo hi, hrilh nawn hrilh nawn kan ngai a. Sawi nawn fo a ngai a, nitinin kan nunah kan lantir a ngai a ni.

Thawnthu hlui chu min hrilh rawh, Van chunga chanchin thu; Engtin nge min chhandamzia, Lal Isua khawngaih thu.