I LAMAH MIN HIP RAWH

I LAMAH MIN HIP RAWH

Jakoba 4:8
“Pathian hnaih rawh u, tichuan anin a hnaih ang che u. Mi sualte u, in kutte silfai rawh u; rilru bulbal nei lote u, in thinlung tithianghlim rawh u.”

Kristian Hla bu 266-na, ‘I lamah min hip rawh’ tih hla hi Sarah Fuller Flower Adams (1805 -1848) phuah a ni a. He chawimawina hla hian thil chhinchhiah tlak tak tak a vawng tel tlat mai hi a danglamna leh ropuina a ni awm e.

May 21, 1889 khan Johnstown khawpui chu tui lianin a nuai a. Rel pakhat rawn tlan chu tuipui rawn phul bulh bulh nen chuan an innangching a, tuilian chu a nat em avangin chhan hman reng an ni lo. An zinga Missionary pakhat chuang ve chuan a thiante thlabar em em mai a hmuh chuan a tawngtai a, tichuan he hla hi a sa ta a, ‘I lamah min hip rawh, aw ka Pathian’ tiin. Lungngai leh tap chungin a thei thei ten an rawn zawm ve a, an zavai chuan mittui nen an sak theih thleng an sa a, thlamuang taka awmin tuilian chuan an nunna a laksak ta a ni.

Kum 1907 khan New York leh Rhode thiarkar inkara kal thin Mei lawng (Steamer) an tih chu a chesual a, a pil mai dawn a, chhantu an nei si lo, chuta chuangte chuan tawngtai chungin ‘I lamah min hip rawh, aw ka Pathian’ tih hla hi an lo sa rual tawh a. Chu mai a la ni lo, kum 1912, April 14-a Atlanta tuipuia khawvel theihnghilh theih tawh loh Titanic lawng pil tura mi 1500 chuang lai thlamuanna nena thlah liamtu hla duhawm leh mawi tak kha a ni.

Nearer, My God, to Thee” tih hla hi Pathianin a hmang hle tih chu kan hre theuh awm e. A hla kan sak pawh hian kalsan lotu a awm tih leh thlamuanna riau min pek hi kan hre thei ang. Dam lo, hrehawm tuar, lungngai leh chau tak te pawhin thlamuang taka thlamuantu an auh theihna leh an rilru Pathian pawla awma an duhna te an len chhoh tir delh delhna hla hahdamthlak tak a ni.

“I lamah min hip rawh, aw ka Pathian, Kraws hrehawm pu pawhin ka lo hnai ang.”

avatar
  Subscribe  
Notify of
Copyright © 2017-2020 Our Daily Bread Mizo.
Privacy Policy