MUT THLAHLEL SUH 2-NA

THUFINGTE 20:13
Mut thlahlel suh, i lo pachhe dah ang e; I mit meng la; tichuan, chhang kham khawp i nei dâwn nia.

Kan ṭhalaite zîngah dâr riar dâr kaw thleng thlenga mu vum thûr, kaihthawha ṭeu hlur, khum laizawl aṭanga insual lo ngam êm êmte pawh hriat tûr kan awm ta nawk mai! Pachhiatna leh tlâkchhamnain min nang mêk zawng a nih hi!

Sazupui leh satel intlânsiak ṭuma sazupui a chak loh zâwkna chhan kha mut a thlâkhlelh vâng a ni a. Kan Mizo nula leh tlangvâl tlawntlai ṭha tak tak, chak hmel deuh deuh hote pawh hian mut kan thlâkhlelh chuan hnam dang thirchhe zawnga bulṭan hote hian min len khalh zung zung mai dawn a ni.

Ram changkâng, dârkâr bia inhlawhna tûr an neihna ramah hna vânga zân lama meng rei an tam a. Keini ve chu cheng khat mah hlawh ve lohna tûrah TV enin kan meng ve vak vak a, zîng lamah kan mu leh tluk tluk si ṭhin a. Hei hi chu retheihna hri, Setana min bumna a ni tih i hria ang u.