IN RIN ANGIN THLENG RAWH SE

MATTHAIA 9:28-29
Tin, ina a luh chuan mitdelte chu a hnênah an lo kal a; tin, Isuan an hnênah, “Hei hi ti theiin mi ring em?” a ti a. Anni chuan a hnênah, “Ring e, Lalpa,” an ti a. Tin, ani chuan an mit a dek a, “In rin angin in chungah thleng rawh se,” a ti a.

Mitdel pahnihin Isua an zui a, “Davida fapa, min khawngaih rawh,” tiin an au va. Isuan an ring tak zet em tih a hre duh a. An mit a dek a, an mit a lo vâr ta mai a ni. Isuan tihtak zeta amah mamawhtu a hai lo. Kâ chauh ni lo, thinlung taka amah ringtu, an rinna pên chhuahpuitu a ngai pawimawh. An rin loh miau chuan ama khaw lamah pawh thil mak a ti tam lo (Mk. 6:4-6).

Laodikei khua chu Lalpa’n pachhia, mitdel leh saruak angin a hmu a. Mit vâr emaw kan intih lai hian kan mit a lo del ve reng em? Mosia chuan hmuh theih loha chu a hmu thei tlat mai. Hmu theiten fiah leh zual a hmuh dîl ila, tidamtu i pan ang u.

I ropuina zawng zawng hmu tûrin,
Ka mit min tihmensak ang che;
Tangka leh rangkachak ai pawhin,
Ka tân chu chu a ṭha zâwk e.

Kan rin ngamna chenah damna kan hmu ang.