AN SEM ṬHEUH ṬHIN A

TIRHKOHTE 4:34-35
Tin, an zîngah pawh tlachham tu mah an awm lo; ramte, inte nei apiangin an hralh a, an thil hralhte chu a man an rawn keng a, tirhkohte ke bulah an dah ṭhîn a; an châkkhai daih tâwk ṭheuhvin an sem ṭheuh ṭhîn a.

Ringtu hmasa ten engkim an inṭâwm a, an châkkhai daih lek ṭheuhvin an zaa hnênah chuan an sem ṭhin a, lungawi takin an ei ṭhin (Tirh 2:44-46). Hetiang tak a inrual tlâng hian kan ti thei kher lo pawh a ni thei e, amaherawhchu, ‘Nangmah i inhmangaih angin i vêngte i hmangaih tûr a ni (Mk 12:31)’ tih hi zâwm ila chuan, ‘Sem sem dam dam, ei bil thi thi,’ tih hi nunpui a awl sawt ngei ang le.

Mizoram zîm têah pawh khawvêl hausakna kan insem dân hi a rual lo ve ta khawp mai. Kan Zosâpten pâwl ṭha tak mai YMA (Young Mizo Association) min lo dinsak a, he pâwl hian vawi tam tak mi rethei a lo tuam hlâwm tawh a ni. Mimal, chhûngkuate pawh hian mi dang tâna pêk chhuah i uar sauh sauh zêl ang u.

Pe rawh u, tichuan, pêkin in awm ang,
Pêkah Pathian i hnehbân thei lo vang;
Pathianin mihring lei a ba ngai lo,
Malsâwmna hnâr a lo ni si.

LALPA, kan thil neih sem tûrin min pui ang che.