HLAU SUH, RING MAI RAWH

MARKA 5:35-36
A la ṭawng lai mêkin inkhâwmna in hotu in ata chu mi an lo kal a, “I fanu a thi ta; engah nge zirtîrtu hi i la tihhah cheu dâwn?” an ti a. Isua erawh chuan an thusawi chu bengkhawn lovin, inkhâwmna in hotu hnênah chuan, “Hlau suh, ring mai rawh,” a ti a.

Jaira fanu, kum 12 vêl mi, Judate dâna puitlinga an chhiar ṭan lai vêl chu a dam lova, Jaira chuan, mi dang pawh tîr lovin Isua a rawn pan a, a ke bulah bawkkhupin, a fanu a lo dam theih nân, a chunga kut nghat tûrin a ngên a. Jaira in pana an kal lai chuan a fanu thih thu an rawn sawi a. Jaira inah chuan an lo ṭap tuar tuar a. Isuan naupang chu, ‘a thi lo, a muhil’ a tih chu an nuihsan a. Mitthi chu a kai tho va, a kal thei ta nghâl a ni. A dam a ni tih entîr nân Isuan ei tûr pe tûrin a hrilh a (Lk 8:55).

Jaira khân beidawng lovin Isua a ring a, a fanuin damna a chan phah ta a ni. Isuan, “Hlau suh, ring mai rawh” min ti a, ringhlel lovin Isua i ring zêl ang u.

Hlau suh, zâm hek suh la,
I hnênah a awm reng;
A ṭanpui zêl ang che,
Tin, i lo chak leh ang.

Beidawng lovin Isua i ring tlat ang u.