HLA

SAM 100:1-2
Ram zawng zawngte u, Lalpa chawimawiin hlim takin au rawh u. Lâwm chungin Lalpa rawng bâwl ula; Hla sa chungin a hmaah lo kal rawh u.

Pathian kan biaknaah hian hla hian hmun pawimawh tak a luah a. Bible-ah pawh hian hla hian hmun zâu tak a luah nghe nghe a ni. Chaw leh chawhmeh a intitui tawn ang hian thu leh hla ṭang kawp hian kan thlarau nun a châwm a, a tiṭhang lian ṭhin a ni. Thuin a sawi fiah sên loh hi hla hian a sawi fiah zâwk châng a awm fo.

Mizote hi kan vannei hle mai! A hun leh a hmun azira hla sak tûr hi Pathianin min pe vek emaw tih mai tûr a ni. Kan pi leh pute hun aṭang tawh khân hla hian Mizote thinlungah hmun zâu tak a lo chang tawh a. Chanchin Ṭhain a rawn tifamkim a, belh ngai a belh a, paih ngai a paih a, siam ṭhat ngai a siam ṭha a. Hnam bil ang zâwnga sawi pawhin Mizote tluka hla ngah hi hetiang mihring zâtah chuan an awm bîkin a rinawm loh. Kan hlate avâng hian Pathian hnênah lâwmthu i sawi fo ṭhin ang u.