RAWNGBÂWLTU INNGAITLÂWM

MATTHAIA 23:10-12
‘Hruaitute’ tihin awm hek suh u, in hruaitu chu pakhat chauh a ni, Krista chu. In zînga ropui ber chu in rawngbâwltuah a awm zâwk tûr a ni. Tu pawh inngaihlu apiang an tlâwm ang a, tu pawh inngaitlâwm apiang chawimawiin an awm ang.

Mi aia ropui leh lansarh duh vângin theihtâwp chhuah a awl hle. Pharisaiten vantlâng ngaihsak, ngaihven, ṭhutna ṭha, vohbik, adt. an beisei. Mi dang chawimawi emaw chawimawi nih emaw a sual kher lo. Chawimawi leh fak beisei kher erawh chu a hrisel lo.

Rawngbâwltuten vohbik nia inngai tlat an awm ṭhin. Rev. Lalsawma khân pastor dangte hnênah, ‘Berâmpu pakhat kan nei, berampu hi kan ni ve lo,’ tiin a sawi ṭhîn. Isuan, “In hruaitu chu pakhat chauh a ni, ‘hruaitute’ tihin awm suh u,” a ti.

Khawvêl chuan intihhotu nih dânte an inzirtîr ṭhin. Lalram lingletah chuan rawngbâwltu inngaitlâwm ten mite thinlung a hnehin LALPA lamah mite an hnûk hnai nge nge ṭhin. Isua inngaihtlâwmna (Phil 4:5-8) i entawn ang u.

LALPA Isua ang tûrin,
Khawvêla dam chhûng hian;
Pathian rawng chauh bâwl tûrin,
Mahni inpe vekin.

Inngaitlâwmte chu chawimawiin an awm dâwn a ni.