CHAW NGHEI-2

MATTHAIA 6:16-18
Chaw in nghei hun pawhin, mi vervêkte angin ngui hmêl pu suh u; anni zawngin mi mit hmuha chaw ngheia an lan theihna tûrin an hmêl an tipawr si ṭhîn a. Tihtakmeuhvin ka hrilh a che u, an lâwmman chu an hmu zo tawh. Nang erawh chuan chaw i nghei hunin sahriak thih la, i hmai phih rawh; chutichuan, i Pa a rûka awm mit hmuhah chauh lo chuan, mihring mit hmuhah chaw ngheiin i lang lo vang; tichuan, i Pa a rûka hmu ṭhîntu chuan a rûl ang che.

Chaw nghei hi a ṭhat êm avângin Setana pawh hian a hlâwkpui theih dân tûr zâwngin a lo chuhpui ve a. Miin an hre tih hlauhnate a neihtîr a, nghei ve peih lo hmuhsit phah nânte a hmantîr bawk ṭhin. Pharisai tam tak pawh kha Setana bumna thangah an âwk a, mi hriat loh hlauvin an intipâwr lui vêl ṭhin a; Lal Isuan a duh loh avângin chaw nghei dân dik a zirtîr a ni.

Ringtu tam tak chu Pathian leh mite fak nghâk zo lova mahni infak leh inchâwimawi nghal zung zung ṭhin kan ni a. Kan fianrialte pawh hi a fianrial lo zo vek emaw tih tûr a ni ṭhin. Chaw nghei ṭhinte pawhin chaw ngheia an lan loh theih dân an zawng zâwk tûr a ni a. Chaw nghei hi mi dangin an hriat a ṭûl lêm lo, pindan chhûngril lama Pathian nêna inpâwlna a ni.