LAL ISUAN THIHNA A HNEH

JOHANA 11:25-26
Tin, Isuan a hnênah, “Kei hi thawhlehna leh nunna chu ka ni; tu pawh mi ring chu thi mah sela a nung reng ang; nung apiangin mi ring chu kumkhuain an thi lo vang. Chu thu chu i ring em?” a ti a.

Sual vânga thihna chu kraws-ah Lal Isuan thihna vêkin a bei a, thawhlehnain a hneh a, “Keiin khawvêl ka ngam ta,” tiin hnehna hlado a chham chhuak a. “Keimah ka nun avângin nangni pawh in nung ve ang,” tiin thu min tiam a. Bethani khuaa lusûn chhûngkuate hnênah, “Kei hi thawhlehna leh nunna chu ka ni, tu pawh mi ring chu thi mah sela a nung reng ang,” tiin thlamuanna thuchah a sawi a ni tih kan hriat kha.

Thihna luirâlah Lalpa’n min lo hmuak dâwn a, kan tlâwm lai taksa hi ama taksa ropui anga awm tûrin a siam ṭha leh dâwn a ni. Kan hmêlma hnuhnung ber thihna chu Lal Isuan ama hnêna min hruaitu, vânram kawngkhâr kik hawngtu leh kan ṭhian tha berah min siamsak ta zâwk a ni. Lal Isua hnehna avângin,

“Thihnate hlau tawp lo tûrin,
Kan nunna thuhrûk a ni;
Amah a lan hun apiangah,
Ropuiin kan lang ve ang,”

kan ti ve thei ta a ni.