HRUAITU ROPUI MOSIA NUN LEH KAN RAM KALSIAM

— Chhantea (Oriela patea)
E. Lungdar

EXODUS 32:31-32
Tichuan, Mosia chu Lalpa hnênah a han kal leh a, “Aw, hênghote hian thil sual nasa tak mai an lo ti ta a, rangkachak pathiante chu an lo insiam ta. Amaherawhchu, an sual i ngaidam thei ang emaw chu? I theih loh zawngin, i lehkhabua i lo ziak tawh ata kha mi thai bo tûrin ka ngên a che,” a ti a.

Kan Bible thianghlim chhûnga ngaihnawm leh chhiar leh sawi hlawh êm êm mai chu Aigupta bâwih a tâng hnam Israelte (kum 430 lâi an tâng) Mosian a hruai chhuah chungchâng hi a ni a, sermon tinreng hmun luahtu pawh a tih theih hial ang.

Hnam luhlul leh tihmawh, Pathian biakna kawng a ze nghet lo lutuk hnam Israelte tân a Mosia hnathawh ropui lutuk hi sawi vek sên a ni lo. Hnam Israelte hruaitu ropui ni tûr leh hruaitu ṭha ni tûrin Pathian a pâwl tam a, Pathian pawhin a pâwl tam a ni. Pathian hmaah mipuite a kûnpui fo a, Pathian dân bu pawh an chhiar a, hnam Israelte chung a Pathianin ti rawh a tih pawh a ti zêl a. Hruaitu ropui han tih loh rual hi a va ni lo êm.

Chûng zawng aia ropui ka tih êm êm chu Mosia hian Israel hnam/mipuite a hmangaih dân êm êm kha a ni. Mipuite khân Mosia tlângah Pathian pâwla Pathian thupêk te leh thurâwn leh tih tûr te la a a awmlai (Sinai tlâng a thu sâwm pêk leh dân te a lâk lai) ti mai ang, Arona hnênah pathian dangte siamsak tûrin an ti a. Rangkachak bâwng no lem siamin Pathian an hawisan a nih kha. Pathian a thinur em em a, hnam Israelte kha tihhlum vek a Mosia kha chi ropui takah ka siam ang che a ti hial a ni (Exo 32:9,10).

Mahse, Mosia khân chi thlahtu ropui nih aiin Israel ho a hmangaihna kha a thûk zâwk a ni ang e, Aigupta miten Pathian an sawi chhe tûr (hnam Israelte tihhlum avângin) chu ngâi ngam lovin, khâng hnam Israelte ngaidam tûrin a ngensak zâwk a, a ngên mai ni lovin a ngaidam thei lo a nih chuan A lehkhabu a ama hming ziak ngei kha thaibo tûrin a ngên zâwk anih kha. Hruaitu ṭha leh ropui a va ni tehlul êm.

Kan ram kalsiam ve hi… inthlang ram kan ni a, kan aiawh rorêltu tûr te mipuiin kan thlang ṭhin. An kâin thu ṭha tin rêng min tiam a, a tak a thawh a awm mang si lo (political party tih bik nei a sawi ka ni lo e). Pathian chu kan hria, a hming pawh kan lam fo. Mahse, Pathian hmaa mipuite kûnpui ngam ram hruaitu hi kan mamawh chu a ni. Mosia anga huaisen leh dik, Pathian ṭih a a thu awih, Pathian thu leh duh zâwng ang a rorêl ṭhîn mi hi kan ram hian a mamawh chu a ni.

VC/LC hruaitu tûr te kan hmâ lawkah kan thlang leh dâwn, kan ram political party tin te pawh hian thu a ram hmangaih mai lovin nun leh thil tih hmangin kan ram hruaitu mipuiten kan thlan theihna atân candidate i siam ang u. Party a nihna te en lo in, kan party hlâwkna leh chanvo ṭha chan duhna rilru dah bovin, party aiin Pathian duh zâwng ngaipawimawh mi candidate siam i tum ang u.

RAM CHU LALPA TA A NI SI A.

SAM 24:1-5
Leilung leh a chhûnga thil awm zawng zawng hi Lalpa ta a ni a, Khawvêl leh a chhûnga chêngte nên hian. Tuifinriat chungahte amahin a din a ni si a, Luipui chungahte pawh a tinghet bawk a. Lalpa tlângah tu nge chho vanga, A hmun thianghlimah tu nge ding ang? Kut fai leh thinlung thianghlim neia, A rilru engmahlo mai mai lama dah ngai lova, Bum tuma chhechham ngai lo mi chu. Ani chuan Lalpa hnên ata malsâwmna a dawng ang a, A chhandamtu Pathian hnên ata felna a dawng bawk ang.

Pathianin a thu malsâwm rawh se.