HAWI KÎR SUH

GENESIS 19:24-26
Tin, Lalpa chuan Sodom leh Gomorra khaw chungah chuan, vâna Lalpa hnên aṭang chuan kât leh mei a sûrtîr a; tichuan, chûng khuate leh phaizâwl zawng zawng leh, khuaa mi zawng zawng leh leia thil ṭote chu a tiboral ta vek a. A nupui erawh chu Lota hnung aṭang chuan a lehhawi a, chi khâwn dingah a lo chang ta a.

Vântirhkohten Lota leh a chhûngte Sodom khua aṭanga an kaih chhuah a, Zoar an thlen lai chuan Sodom leh Gomorra chungah chuan kât leh mei a sûr a. Mi zawng zawng leh leia thil ṭote chu a kâng ral vek a. An hruai chhuah laia hnung lam hawi kîr lo tûra hrilh an ni na a, Lota nupui chuan Sodom khua a thlâkhlelh avângin a hawi kîr hrâm a, chi khâwn dingah a lo chang ta a ni.

Vân khua leh tui ni tûra kan ke kan pên mêk lai hian khawvêl hîpna a nasat avângin hawi kîr mai a awl hle ṭhin. Hawi kîrte chan tûr chu a râpthlak hle ang. Hla siamtuin,

“Ka hma lamah kraws,
Ka hnung lam khawvêl;
Ka hawi kir lo’ng,
Ka hawi kir lo’ng,” a tih ang hian kan tih ve ngam a pawimawh hle a ni.