HMÊLMATE HNÊNA CHANCHIN ṬHA HRIL

JONA 3:1-2
Tin, Lalpa thu chu Jona hnênah a lo thleng nawn leh a, “Tho la, Ninevi khua, khawpui ropui takah chuan kal la, thusawi tûr ka tuk che hi va tlângaupui rawh,” tiin.

Jona hi Gath-hepher (Nazareth bul) a mi a ni a (2 Lal. 14:25), a hming awmzia chu Ṭhuro tihna a ni. Jona hi Pathianin Ninevi khuaah (Israel hmârchhak mêl 500 vêla hla Tigris lui kamah a awm, Assuria ram khawpui) a tîr a, Tarsis (Spain chhim lama awm) lamah a kal ta daih a ni. Zâwlnei thu awih lo tak ni mah se, Pathianin insiamṭhatnan sangha kawchhûng aṭanga chhanchhuakin a tîr nawn leh a ni.

Israel faten thu an zawm loh laiin Ninevi khuaa mite chu vawi khat thusawiah saiip puan sina chaw ngheiin an inlamlêt a, Pathianin a ngaidam. Chanchin Ṭha hi mitin tân a ni tih a zirtîr a, mahni culture pêla Chanchin Ṭha hriltute tân zir tûr ṭha tak a ni.

Hla taka mi thim, Pathian thu awih lote,
Thlarau chhiar sên loh an boral mêk e;
Tute nge kal ang chhandamna thu hrilhin,
Isua lam ena eng pawh huam zêlin?

Min ngaina lote hnêna Chanchin Ṭha hrilh i inhuam em?