RIANGVAITE HNÊNAH CHANCHIN ṬHA

LUKA 4:18-19
“Riangvaite hnênah Chanchin Ṭha hril tûra mi ruat avângin Lalpa Thlarau chu ka chungah a awm; Ani chuan salte hnêna chhuahna thu leh, mitdelte hnêna mitvâr neih lehna thu sawi tûr te, tihduhdah tuarte chhuahtîrna tûr te, Lalpa lungawi kum thu sawi tûr tein, mi tîr a ni,” tih hi.

Sunagog-ah Isuan Isaia 61:1-2 a chhiar a. Khawvêl thila riangvai leh rilrua retheite (Mt. 5:3) chu lâwm taka Chanchin Ṭha dawng tûrte an ni. Sual bawiha tângte chhuahna thu leh sual ngaidama chhuah zalen tûrin a lo kal a ni (Mk. 2:5-12).

Isuan Pathian Thu a chhiar zawh chuan, “He Pathian Lehkha thu hi vawiinah hian in hriatah a lo thleng ta,” tiin a sawi a. Taksaa mitdel bâkah thlarau mitdelte mit tivârin tihduhdah tuarte chhuah zalên tûra lo kal a ni. Riangvaite hnêna Chanchin Ṭha hi a tlai hmain dawng ve ngei ang che.

Riangvai saltâng chhuahna tûrin,
Isua Krista a lo vâkvai;
Tihduhdah tuar, rethei riangvai,
Isua krawsah min hnehsak ta.

Chanchin Ṭha rawngbâwltu kan ni em?