PATHIAN HNAIH

SAM 73:27-28
Ngai teh, nangmah hlata awmte chu an boral dâwn si a; A uiresantu apiang che chu i tiboral ta a. Keia tân erawh zawng Pathian hnaih hi a ṭha a ni; Lalpa Pathian chu ka inhumhimnaah ka hmang a, I hnathawh zawng zawng thu chu ka hrilh theih nân.

Sam 73-na hi ngun taka chhiar chuan a phuahtu nun dân eng emaw chen chu a hriat theih a. Pathian hriatna lo nei tawh, thlêmna avânga tlûk leh din fâwma kal; sakhaw mi tak ni si, sakhaw mi-na pawhin awmzia nei lêm lo anga ngâi thawthâng ṭhin mi niin a lang. Amaherawhchu, Pathian a hnaih hrâm hrâm zêl a, khawvêl mite tâwpna râpthlâk tûrzia te hre thar zêlin, lei leh vânah pawh belh tlâk awmchhun chu Pathian chauh a nihzia a hria a, he Sam ropui tak hi a chham chhuak ta a ni.

Pathian aiin khawvêl hnaih zâwk a awl hlê. Lal Davida leh Solomona te nun ațang pawh khân Pathian aia khawvêl hnaih zâwk a pawizia a chiang khawp mai. In leh lo dinna kawngah te leh thil dang dangah rualawhna avângin Pathian aiin khawvêl hnaih mai a awl. Pathian hnaih hi chhûngkaw hlimna a ni.