MIDANGTE KALTLANGIN

1 JOHANA 1:7
‘Ani chu êng thu chu hriattîr tûra lo kal a ni, mi zawng zawngin a thuchah chu an hriata an rinna tûrin.’

Ringtu nunah chak loh chang leh tluk chang kan nei ṭhin. Harsatna tam tak tawkin kan rinna tihnghina a awm changte pawh a awm ṭhin a. Thlarau Thianghlim ṭanpuina leh tihchakna mamawhin ṭanpuitu kan mamawh fo bawk.

Lalpaah siamthara kan awm dawnin emaw tihchak tharna kan neih dawnin kan chungah hnathawh dan hrang hrang a nei ṭhin a. Chu Lalpa remruatna kan chunga a rawn thlen tir dan chu mihring tan hriatthiam phak rual loh a ni. Hnathawh dan hrang hrang a neih zingah midangte kaltlanga Pathian hnathawh hi a tam em em a. Kan mihringpuite hi Lalpan hmanrua-ah a hmang ṭhin a ni.

Irish nutling, upa lam tawh hian harsatna a tawk a. Mi tam tak hnenah a kal a, mahse a beidawng zel si a. Chu a harsatna Chu Pathian awmpuina a rinhlelh tlat vang a ni. Nikhat Chu a ṭhian hnai tak hian a inah a rawn tlawh a, chu chu remchangah lain a harsatna te chu a lo hrilh a. A inleng, a ṭhiannu chuan, “Pathian hnenah ṭawngṭai ta che, a khawih theihna tur chein dilin ṭawngṭai la, a hmangaihna kut ser chuan thlamuannain a vuan tlat zel ang che” a ti a.

Chu nu chu chawp leh chilhin a ṭawngṭai ta a, Pathian a fak a, chutia a ṭawngṭai lai chuan a darah kutin a rawn khawih a, “Lalpan min khawih ta e” a ti a.

A ṭhiannu hnenah chuan, “Lalpan min khawiha mahse i kut a ang ka ti hle mai” a ti a. A ṭhiannu Chuan, “Ni e, ka kut a nih kha, Pathianin engtin nge rawn khawih che se la i duh, Van aṭangin a kut rawn tiseiin a rawn khawih che i phut kher em ni? A hnaih ber kut chu a la a, chu chu a hmang ṭangkai ta a nih kha” a ti a.

Lalpa’n hmanraw chi hrang hrang a hmang ṭhin a. A hmanruate chu kan hriatfiah thiam theihna turin finna kan dil tur a ni.