CHHANCHHUAHNA ROPUI

SAM 54:7a
Ka manganna zawng zawngah chuan mi chhanchhuak ta si a.

Chile rama thil laih chhuahna khur chim avânga hnathawktu mi 33 metre 700 dâwna thûka an tâng khawngaihthlâkzia kha kan la hre reng âwm e. Khawvêlin lainatna thinlung nên mittui tla chungin a thlîr ṭhup mai a nih kha! Chile sawrkârin chhanchhuah dân tûr beng sikin a ngaihtuah a. Ni 69 khur chhûnga an tân hnuah an vaia chhanchhuah niin khawvêlin a lâwm avângin a kut a bêng a. Dinhmun hrehawm leh khirhkhân taka an tâng an chhanchhuah avâng khân an President Pinera pawhin, “Chile ram hi khawvêl pawhin a zahin a ngaihlu sawt a ni,” tiin a thusawi tlâng a kawm nghe nghe a nih kha!

He chhanchhuahna ropui tak ai hian kum 2000 chuang zet kal taa Pathianin a Fapa Isua Krista hmanga sual bâwiha tâng hring fate min chhanchhuak kha a ropui daih zâwk. Khâwl a hmang ve lo va, khawvêl ngaiha hmanraw ngaihsânawm loh tak, kraws hmangin chhanchhuah hna min thawhsak a ni.