INRENCHEM 2-NA

ISAIA 55:2
Chaw ni si lovah eng vângin nge tangka in sên? Puar leh fânna ni si lovah eng vângin nge in tha in sên?

Kan Bible hian puar leh fânna pawh ni si lo va sum leh tha sên vak vak hi ṭha a ti lo hle. Chhûngkaw khawsakna pawhin a mamawh hauh loh, a chhiatpui zâwk daih thil zûk leh hmuamah te, zû leh ruihhlo lamah te leh sex lamah te mi ṭhenkhat chuan sum tam tak an sêng a. Chu mai bâkah taksa a tihchhiat ngai awhtir nân tam tak sên a ṭûl leh ṭhin.

Mizote hian kan mamawh ni lo, kan duh zâwng leh châk zâwngah hian kan inhmang zo ṭhin niin a lang. Kan hmuh chawp leh kan duh chawp thil lei kan chîng lutukte hi bânsan a hun ta hle mai. Nuho bazâr kal pawh hian an kal chhan loh lei hâwn vak an chîng khawp nia! Thla tâwpa a baa thil lâk a ṭûl leh ṭhinte pawh hi a ṭûl bâk thila kan insên tam vang a ni fo. Hlawh nei ve lote pawhin hlawh kan neih ve theih dân chu a awm sa renchem thiam leh mamawh tihtlêm thiam hi a ni. Lâk luhna dang nei lêm lo mah ila, a awm sa kan ren thiam chuan tam tak la lût ang kan ni thei a ni.