MIHRING HMÊLMA – ZÛ

THUFINGTE 20:1
Uain hi nuihzatbûra mi siamtu a ni a, Zupui hi insual bûng bûngna a ni; Chumi buma awmte chu an fing lo a ni.

H.W. Gibsona’n zuin a nihna a sawi dân a ziak hi a dik hmel khawp mai. Hetiangin – “History-a pawi khawihtu lian ber ka ni a. Khawvêl indonaa thi zawng zawng aia tam ka that tawh a. Mi ka tichhia a, chhûngkaw tam tak tilungngaitu ka ni a. Ṭhalai tam tak beisei bova siamtu ka ni bawk a. Mi tam tak kawng chhuk chho zawhtirtu ka ni. Mi chak lo ka tichhia a, mi chak ka tichak lo va. Mi fing ti â-tu ka ni a. Pawi sawi lo âwktu ka ni a, nu leh naupangte tiretheitu ka ni. Nun tam tak ka tichhia a, tihchhiat ka la tum zêl bawk a. Ka hming chu ZÛ a ni,” tiin.

Zû chu mi ang mi ang lova siamtu a ni a, nupa inhautîrtu leh kut inthlâktirtu a ni a. Nupa ṭâng ṭhentîrtu leh fahrah siamtu a ni. Setana zia la hre chiang lote tân hriat chianna ṭha ber a ni. In ti ve ṭhin a nih pawhin sim ula, in tih ngai loh pawhin ti ṭhin pakhat talin a sim theih nân ṭawngṭaipui mawlh mawlh ang che u.