VÂN LAM A EN TLAT

TIRHKOHTE 7:55
Nimahsela, ani chu Thlarau Thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a.

Stephana chu ‘Mosia leh Pathian a sawi chhiat kan hria’ tiin an hêk a (Tirh 6:11). Puithiam lalber hnênah an thlahtute anga Thlarau Thianghlim an dodâl fo te, thinlung leh beng tan loh an nih zia te, zâwlnei tihduhdah loh ahleih an neih loh ziate a sawi a. Dân an zawm si lohzia nên lam a sawi a. An thin a rim ta êm êm a. Khua ata an hnawt chhuak a, Saula ke bulah an puante an dah a, lungin an dêng ta a ni.

Stephanan amah den hlum tumtu lam a en lo, vân lam a en tlat ang hian vân lam kan en tlat chuan Pathian ropuizia kan hmu thei ang.

A hnehtu apiangte lallukhum a pe,
Rin vângin kan hneh ang, chauh châng awm mah se;
Kan Chhandamtu chuan hneh tûrin min pui ang,
Isua lam en fo la, a hruai zêl fo vang che.

Harsatna i tawh chângin Krista nge i en khawvêl theihna leh chakna?