THLARAU THIANGHLIM

JOHANA 6:63
Tinungtu chu thlarau a ni, tisa chu eng mahah a tlâktlai lo; in hnêna thu ka sawite hi thlarau a ni, nunna pawh a ni.

Switzerland rama Pathian thu thiam (Theologian) ropui Karl Barth-a hnênah Billy Grahama’n, “Pathian thuah hian eng nge sawi uar fo ṭûla i hriat?” tia a zawhna chu, “Thlarau Thianghlim,” tiin a chhâng an ti.

Thlarau Thianghlim hi Pentikos niah a lo thleng tawh a. Keinina nghah ngai tawh lovin aman min nghâk tawh zâwk niin a lang. Mi mal leh a huhovah a chêt theihna tûr boruak kan siam theih phawt chuan hna thawk tûrin a inpeih reng zâwk a ni.

Thlarau Thianghlim hi thli nêna tehkhin a ni ṭhin a, hmuh theih loh, nasa taka a hnathawh lantîr ṭhin a ni. Electric current nên pawh a inanna lai a awm. Current chakzia leh thiltihtheihzia hrechiang apiangin a hman ṭangkai dân an hre tam mai a, Thlarau Thianghlim pawh hi a hrechiang apiangin an chhawr ṭangkai thiam mai a ni. Nangmahah engtiang takin nge a thawh tawh le?