ISUA ZUITU

MATHAIA 4:18-19
‘Galili dîl kama a lên pahin unau pahnih, Simona, Petera an tih leh Andria chu dîla an lên dêng a va hmu a; sangha man mi an ni rêng a. An hnênah, “Mi zui rawh u; tichuan, mihring mantuah ka siam ang che u,” a ti a.’

Kum 1962 khan India chuan President a nei thar a. A hming chu Sir S. Radhakrishnan a ni. Kum 1909 khan Madras Presidency College-ah Philosophy a zir a, zirtirtu ṭha tak a ni a, Indian Philosophy leh sakhuana lam phei chu a zir nasa em em a, hriat pawh a hre hle a ni.

Vawikhat chu Kerela zirlai naupang hian zawhna a zawt a, “Sir, ka hringnunah tuemaw mipakhat tal zui tur ṭha tak ka duh a, tunge ka zui ang tih min hrilh thei ang’em?” a ti a. Radhakrishnan-a chuan rang takin “Isua Krista” a ti a, sawi chhunzawmin “Thuthlung tharah i hmu ang” a ti a.

Chu chhânna chu tihlawhtling turin tlangval chuan hma lâk a tum ta a. Bible Society of India in a graduation lawmpui nâna an pêk Thuthlung Thar chu a zir ta a. Matthaia ziak aṭangin a chhiar ṭan ta a, chanchinṭha bu li a chhiar zawh chuan chhiar châkna leh zir châkna thinlung a nei zel a. A duh tâwk thei ta reng reng lo mai a.

Isua Krista chu zui tur atâna ṭha ber ni mai lovin khawvel chhandamtu a nihzia te a rawn hre chho ta a, a piangthar ta hial a ni.

Chu tlangval chu rawngbawltu lâr tak, Paul Sudhakar a ni a, India ram hmun hrang hrangah kalin Pathian thu a hril ṭhin a, Pathian tana mi ṭangkai tak a lo ni ta a ni.

Lal Isua hmutu leh hrechiangtu chuan a kalsan phal lo a, a lên te bângin a zui ṭhin. Amah chu hriatchian lehzual a duh a, atân a nun zawng zawng a hlan ṭhin a ni.

‘Kan sakhaw thurûk rilzia hi hnial rual a ni lo ve: Ani chu tisa puin a lo lang a, Thlarauvin a dikzia a tilang a, Vântirhkohte pawhin an hmu a, hnam tin zîngah puan darh a ni a, khawvêl puma miin an ring a, Ropui taka lâk chhoh a ni ta.’ – 1 TIMOTHEA 3:16