THLAHTU RUAT LÂWK

GENESIS 18:18
Abrahama hi chi ropui leh thiltithei tak a lo la ni ngei dâwn a, amahah chuan khawvêla chi tin an la thawveng dâwn si a.

TIRHKOHTE 3:25
Nangni hi zâwlneite leh thuthlung fate in ni asin; Pathianin Abrahama hnênah, ‘I thlah avângin khawvêla hnam tin an thawveng ang,’ tiin, in thlahtute hnênah a tiam kha.

Pathianin a fapa he khawvêla a rawn tirh hmain a thlahtute a lo ruat fel diam mai. Abrahama chi aṭanga chi tin hnam tin thawvenna lo chhuak tûr chu a thlen dikna chu Mt 1:1 leh Lk 3:34-ah kan hmu.

Balaama hrilhlâwknaah Isua chu Jakoba thlah a nih tûr kan hmu. Jakoba aṭangin arsi a lo chhuak ang a, Israela aṭangin lal tiang a lo chhuak ang (Num 24:17; Mt 1:2 leh Lk 3:34; Gen 49:10; Lk 3:33; Mt 1:1-2). Pathian chatuan remruatna hnuaiah Isua a lo piang a ni tih chiang takin kan hre thei a ni. Lei leh vân Lal i fak ang u.

Khawvêl lâwm nân ro a rêl a,
Miten zaiin fak se;

Pathian remruat thleng dik lo a awm lo.