KRISTA A NI E

KOLOSA 1:27
‘Chûng mite hnênah chuan hnam tin tâna a thurûk ropui leh hlu tak chu Pathianin hriattîr a duh rêng a ni; chu thurûk chu Krista, nangmahnia awm, ropuina beisei chhan chu a ni.’

Sadhu Sundar Singh-a chanchin hi sawi leh ṭhin a ngai a. A chhan chu a nunah Pathian inpuanna te, a ropuina te, a thiltihtheihna te hi a taka hmuh tur leh hriat tur a tam em vang a ni.

Sikh sakhua vuantu chhungkua aṭanga seilian a ni a. Kristiante kha a tiduhdah hial ṭhin. Mahse Pathianin a nun a tidanglam a, khawvel mite hriat khawpin a hmang ta a ni.

Khawvel ram hrang hrang fangin a nuamah pawh a hrehawmah pawh Pathian thu a hril ṭhin a. England rama a kal ṭumin vawikhat chu Professor pakhat nen an intawng a, chupa chuan “Sadhu, Sikh sakhua aṭanga Kristian sakhua-a inlet tur hian Kristian sakhua-ah hian eng chiah nge i hmuh a?” tiin a zawt a.

Sadhu-a chuan, “Krista a ni e” tiin a chhang a. Professor chu a chhanna-ah chuan a lungawi zo lo a. Zawt nawn lehin, “Eng zirtirna leh thurin vangin nge min han hrilh teh?” a ti leh a. Sadhu-a chuan, “Krista a ni e” ti bawkin a chhang a.

Professor chuan, “Sadhu, Isua Krista chu a hming ka hria e. Mahse eng rinna leh zirtirna danglam bik tak Kristiante hian an neih min hrilh rawh?” a ti leh a. “Krista a ni e” tih chu a chhanna ngai a ni.

Thurin a ni lo, thil chhuina lam a ni lo a, rinna nghahchhanna lam a ni hek lo. Isua Krista-an khenbeh, tho leh-a kha, kan beisei lo kal leh tur kha a ni, kan nun tidanglamtu chu.

1 KORINTH 2:2 – In zînga ka awm chhûngin Isua Krista leh Krawsa khenbeh a nih thu chauh lo chu eng dang mah hria nih ka tum loh kha.

Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” a ti a. – TIRHKOHTE 4:12