HAUSATE

1 Timothea 6:19
‘nunna, nunna tak tak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh.’

1 Timothea 6:17-18 – ‘Hemi khawvêla hausate hi chapo lo tûr leh, sum rinawm lovah hian an beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk tûrin zilh rawh; thil ṭha ti tûrin, thil ṭha tih ngah tûrin, thilphala thawhlâwm peih tûrin,’.

Timothea hnenah hian Tirhkoh Paula chuan hausak tumte fuihna thu a sawi a. Chutah chuan hausa tawhte chu chapo lo tur leh engkim Pathian pêk a nihzia leh a hnêna an dawn a nihzia a sawi a. An beiseina leh rinna chu an ro-ah nghat lo turin a ti a ni.

Sum leh pai leh hausakna te hi anmahni mai chuan sual (evil) a ni lo va. Engkim mai hi Pathianin kan hlimna tur leh kan lawmna tur te, kan mamawh atana kan hman tur tein a siam a, min pe a. Lawm takin min chantir a ni.

Mahse kan thil neihte chu min petu aiin kan hmangaih ṭhin a, kan rilru leh ngaihtuahna zawng zawng kan thil neihah chuan a awm ṭhin a. A pawi hle. Kan thlarau dinhmun a him zawk theihna turin hralh vek zâwk ila, kan tan a ṭha ang.

Tunlai khawvelah eng thil nge awm kan hria, Krista chanchintha ni lo, khawvel bungraw thar chanchin chuan nitin min tuam a, min hel a, min hip a, chûngah te chuan kan intlansiak huai huai ta mai a. Mahse, uluk takin i ngaihtuah ang u, chungte chu boral mai tur a ni a. Nunna tak tak min pe thei lo a ni. Pathian thu erawh chu nunna a ni a, kumkhua-in a boral .

Thufingte 4:23 – ‘Thil dang ber aiin i thinlung vêng ṭha rawh, Nunna lo chhuahna a ni si a.’