BELHCHIAN DAWL LO

BELHCHIAN DAWL LO

1 TIMOTHEA 4:12
‘I naupan avâng maiin tu man ngainêp che suh se, thu sawiah te, chêtziaah te, hmangaihnaah te, rinnaah te, thianghlimnaah te ringtute entawn tlâkin awm ang che.’

Vawikhat chu thil nungho hi an inhmukhawm a. School din ṭha niin an hria a. An school din turah chuan an tum ber chu tute pawhin an thiam loh an zir tur a ni a, midangten an thiam chu a thiam lo hnenah an zirtir zel tur a ni tih a ni.

Varak te, Ui te, Sava te pawh an tel ve a. Tichuan school chu an han ṭan ta a. An thiam loh zir tur chuan an inbuatsaih ta a.

Varak chu a rawn kal a, ani chu tuihleuh thiam tak a ni a, eng anga thuk-ah pawh a pil ngai lo. Mahse a thiam loh chu zir turin School a kal a, Ui chuan tlân a zirtir ta a, leia tlân ngai reng reng lo chu a theihtawpin a tlan a, mahse tlân a harsat khawp mai. Tuihleuh chu nise pakhatna a ni leh ngei ngei ang.

Ui chu tlan lamah a chak em em a, mahse Sava chuan thlawh a zirtir ve ta a. An inzirtirna lamah Ui chuan a ke te, a nakruh te, a khabe ruhte a titliak ta rem rum mai a. Zir chhunzawm thei ziazang ani lo.

Sava pawh chuan a thiam loh a zir ve a ngai ta si a, tuia cheng ngai miah lo a ni a. Varak chuan a zirtir ve ta a. Mahse a lo thiam lo em em a, an inzirtirna lamah chuan a thi teuh hle.

Kum tâwp a lo ni a, an zirchhuah chu thilnungte chuan an nihna lo turah chuan engahmah an lâktlâk lo tih an inhria a, School pawh chu an titawp leh ta a ni.

Kan hriatreng tur chu Pathianin min siam dan ang ang hian kan inpawm tur a ni a, kan nih loh anga lan te, lemchang ang maia midangte entawn te hi a ṭha lo a ni. Kan nih ang ang kan nih lohin tunge kan nih ang le! Pathian chuan kan awm ang angin min hmangaih vek a, min siam dan ang ang hian a ropuina turin min hman a duh a ni.

A dera nun te, mahni lo anga lan tum te, kan nihna anga lan ngam loh zawng zawngah te hian kan bum nasat ber chu mahni hi a lo ni.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy