UPATE KHAWVEL

UPATE KHAWVEL

THUFINGTE 3:1-2
‘Ka fapa, ka zirtîrna theihnghilh suh la, Ka thupêkte vawng tlat ang che. Tichuan, rei tak i dam ang a, I hmuingîl zêl bawk ang.’

Kum upa tak takte hian an ram tân leh he khawvêl tân hian thil ropui tak tak an lo ti tawh a. Tunlai khawvel hi ṭhalaite khawvel ti ṭhin mah ila, ṭhalaiten kum upate an tluk lohna leh Pathianin malsawmna leh finna leh thahrui chak zâwk tam tak a pêk hi kan lo hmuh hmaih ṭhin a ni.

Winston Churchil-a kha kum 81 a nihin Prime Minister a la ni a. Clara Barton kha kum 83 a nihin International Red Cross hotu lu ber a la ni a. Robert Frost-a khân kum 80 a nihin poem lar tak tak a la phuah ṭhin a, Oliver Wendell Holmes pawh kha kum 90 a nihin Chief Justice a la ni fan fan bawk.

Connie Mack kha kum 88 a nihin Baseball Team champion Manager a la ni thei a. Toscanini kha kum 87 a nihin khawvêla zaipawl lâr tak conductor a la ni thei bawk. Thuhriltu lâr John Wesley-a khân Pathian malsawmna dawngin kum 88 a nih pawhin thu a la sawi ṭhin a ni.

Chancellor Conrad Adenauer, German mi kha kum 90 a nihin hritlâng khawsik a nei a, a daktawr chu a ko a, mahse a dam lawk thei si lo a, a daktawr chungah chuan a thin a rim ta a. Daktawr chuan, “Ka pu, magician ka ni lo a, naupang tak turin ka siam thei lo che a ni” a ti a. Chancellor chuan, “Naupang takin min siam leh rawh ka ti lo, upat zêl ka duh avangin dam hi ka mamawh a ni” tiin a chhang.

Mi tam tak hriselna leh dam reina chhan pakhat chu an thuawihna vâng a ni kan ti thei ang, chu chu Pathian malsawm ropui tak a ni. Chutihlai chuan thianghlim lo leh bawlhhlawh taka nun kan hman chuan, kan hrisel lo a, kan dam rei lo a; Pathian rawng pawh rei tak kan bâwl thei ṭhin lo a ni.

“I tân a ṭha ang a, leiah hian i dam rei bawk ang,” tih a nih kha. – EFESI 6:3

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy