BAWLHHLAWH MALSAWMNA

BAWLHHLAWH MALSAWMNA

SAM 37:3
‘Lalpa ring la, thil ṭha ti rawh, He ramah hian awm la, A hausakna tlân rawh.’

Biak in nalh tak tak kan nei a. Ṭhenkhat phei chu a mawiin a ropui hle. Biak in hi kan Pathian in anih avang leh amah kan biakna hmun thianghlim anih avangin kan uluk tur pawh a ni a. Amaherawhchu a enkawl kawngah leh a thianghlimna vawn kawngah erawh tun aia nasa kan ṭan lehzual a ngai hle.

Naupang pakhat fel deuh mai hi Kohhran pakhat chuan a nei a. Chu naupang chuan faina a ngaina a, bawlhhlawh reng reng a hmun lohah a paih ngai lo a, miten thatchhe taka bawlhhlawh bawma an vawm lût angin a ti lo a, a bâwmah a thlâk thlap thlap ṭhin. An Biak ina kal chângte hian a hung chhûnga bawlhhlawh a hmuh reng reng te chu a chhar ṭhin a. Miten an hmu a, ṭhenkhat erawh chuan intifel ti tein an sawi mai ṭhin.

Engahmah ngai duh lovin ṭha takin a phâk ang tâwkin an Biak in mawi tak chu a tifai ṭhin a ni. Vawikhat chu an Biak in kawtah thil fûn hi a let bal mai a, mite chuan bawlhhlawhah ngaiin an chhar duh lo a, chu naupang pawh chuan bawlhhlawh emaw tiin a tihdan pangngaiin a bâwmah paih tumin a chhar a, mahse bawlhhlawh a lo ni awkawng lo mai a. A chhûngah chuan rangkachak ṭhi nalh tak a lo infun reng mai a, naupang chuan paih loin an chokidar hnenah chuan a pe ta a.

Chu rangkachak ṭhi chu an Pastor nupui tih bo a lo ni reng mai a. Pastor nupui chuan a hmu lêt leh thei chu a lawm em em a. A chhartu naupang chu a ko a, lawmman ṭha tak a pe ta hial a ni.

Chu naupang chu ngaihsan tur dik tak a ni. A huho-a kan tih loh chuan intifel angah kan sawi a, kan ngai thei lo hial ṭhin. Danglam ngam, mite sawisêl pawh haw lo, mal tlat ngam ringtu kan nih ngam te pawh hi a pawimawh hle.

Sual hawisan la, thil ṭha ti rawh, Remna zawng la, ûm zêl ang che. – SAM 34:14

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy