ṬHALAITE KHAWVEL

ṬHALAITE KHAWVEL

THUHRILTU 11:9
Ṭhalaite u, in ṭhat lai hun hi chên ula, In la naupan lai hian hlim takin awm rawh u. In duhzâwng chu ti ula, Ṭha in tih angin awm rawh u. Amaherawhchu, in thiltih ang zêlin in chungah Pathianin ro a rêl dâwn tih hre reng rawh u.

Hmanlai ata tawh he khawvel hi ṭhalaite tana Pathian siam a nihzia kan hre tawh a, Bible-ah pawh ṭhalai tam tak hmangin hna a thawh ṭhinna pawh kan chhiar ṭhin a ni. Heng ṭhalaite hnathawh hian a tichiang hle awm e;

Alfred Tennyson-a khan kum 18 a nihin lehkhabu ṭha tak a tichhuak a. Napoleon-a khan kum 25 a nihin Italy ram ropui a hneh der mai bawk a. Chutihrual chuan kum 37 mi lek ni a, ṭhatlai hun tlemte nei Byron-a leh Raphael-a an tih chuan lehkhabu ropui tak an ziak hman bawk.

Scientist Newton-a khan thil hmuhchhuah ropui tak a neih khan kum 25 mi lek a ni. He khawvela thil ropui tak tak titute hi kum 20 aṭanga 40 inkâr an ni tlangpui.

Kan ṭhatlai hun hi rei lo hle mah se thil tam tak tihtheihna kan nei a. Kan rilru a chak a, tha leh zung kan ngah a, khawvel mite pawhin kan thu leh hla an ngaichang hle bawk.

Kan ṭhatlai hun hi Pathian rawng kan bawl theihna hun ṭha ber a ni a. Chu hun chu Pathian pawhin min hman nasat lai ber a ni ṭhin. Chuvangin Lalpa’n kawng engemaw tal chuan min hmang thei a ni tih hriain a lam kan hawi tlat a ngai a ni.

Chutih lai erawh chuan kan hriat atana pawimawh em em chu; ‘Setana hi Pathian duh lai taka chet tum tlat ṭhin a ni’ tih hi. Kan ṭhatlai hun takah hian hmelma pa Setana hian he khawvelah tawktarh a ngah em em a. Ṭhalai tana itawm, nuam bawk si, mit la bawk si, Krista chanchinṭha ni lo khawvel chanchin ṭha tam tak a dah a. Chuvangin Pathian tana nasa lehzuala kan invawn a, uluk tak nun kan hman a pawimawh hle.

Lalpa ringtute chu, Zion tlâng tihnghîn rual loh, Kumkhuaa awm rêng tûr ang hi an ni. – SAM 125:1

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy