ṬAWNGṬAINA

MATHAIA 6:6
‘Nang erawh chu i ṭawngṭai hunin, i pindan chhûng rilah lût la, kawng khâr la, i Pa, a rûka awm hnênah chuan ṭawngṭai rawh; tichuan, i Pa, a rûka hmu ṭhîntu chuan a rûl ang che.’

Hun a liam zel a, a lo thleng chiah kan hmang meka, a liam leh zel a, lo la thleng tur a awm reng bawk a ni. Chung thil lo thleng apiang mai chu ṭawngṭaina avanga thleng vek ti ila kan sawi sual em em lo turah ngai ang.

Queen Mary khan Scotland sipaite aia a hlauh ber chu John Knox-a ṭawngṭaina a ni e, an ti.

French Revolution-in a nuai ve lohna chhan leh England rama harhna a thlen theihna chhan chu John Wesley-a ṭawngṭaina avang a ni, an ti bawk.

America kawtthlerah harhna mak tak a thleng zut zut a, a chhan an chhui chuan Jonathan Edwards-a ṭawngṭaina vang a lo ni, an ti bawk.

Reverend Billy Graham-a chuan “Ka hrilh ang che u, miten ṭhingṭhi-a an ṭawngṭai chuan hun liam tur chanchin ṭha lo leh bawlhhlawh tak ni tur hi siamṭhat a ni thei ang. Ṭawngṭaina aia ralthuam hlauhawm hi khawvel miten an neih ka la hre lo a ni” a ti.

Lal Isua pawh kha a ṭawngṭai nasa em em a, Mathaia 14:23-ah khan ṭawngṭai turin tlângah amah chauhin a kal hrang tih kan hria.

Tun hunah hian dik takin sawi ta ila, Pathian hnenah kan ṭawngṭai chuan khawvel miten an tawn ngai loh leh an hriat ve phak loh Pathian hmangaihna leh khawngaihna duhawm tak, rilru reng renga hriat sen loh thlamuanna kan nei ang. Chu chuan kan hringnunah nasa takin min pui bawk ang.

MARKA 11:24 – ‘Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.’