PATHIAN TANA TI

PATHIAN TANA TI

1 KORINTH 10:31
‘Chutichuan in ei emaw, in in emaw, thil in ti emaw, in tih apiangah Pathian ropuina tûr hlîrin ti rawh u.’

Kathryn Graham-i chuan, “Kan thil tih apiang hi nuam ti takin thawk ila, chu aia hlimna leh lawmna a awm ngai chuang lo a ni” a ti. Chu chu mihringin kan nuna kan mamawh berte zinga mi a ni.

Engpawh ti ila, kan hna thawh ni lovin a thawktu rilru put hi a pawimawh em em a. Mi tam tak chuan an hna apiang mai hi an ning thuai a, hna dang thawh an tum zung zung ṭhin. Eng hna pawh rinawm taka kan thawh chuan Pathian ropuina kan lanchhuah tir thei a ni tih kan thinlungah kan hre reng tur a ni.

Ben Cohen-a leh Jerry Greenfield-a te chu lehkha thiam tak an ni hran lo. Ice Cream zuarin nisensa hnuaiah phur takin an hun an hmang ral ṭhin. Mahse an chanchin kan zirchian chuan Ice Cream siamtu company lian tak, Ben & Jerry’s Foundation neitu an lo ni reng mai.

Ben & Jerry’s Foundation chu mite hriat hlawh tak company a lo ni ta a. Kum tawpah sum tam tak an lo tipung tawh ṭhin a. Chung sumte chu awmze nei taka hmangin chanchinṭha thehdarhna atan an hmang ṭhin a ni.

Engkim mai hi Pathian ngaihah chuan intluk tlâng vek an ni a. Bible chuan kan thil tih ni lovin keimahni-a Thlarau Thianghlim awma chu a pawimawh zawk thu min hrilh.

Kan hnathawh hi engmah loa kan ngaih chuan Pathian ṭanpuina dilin ṭawngṭai ila, ani chuan kan mit min tihvarsak ang. Atana hnathawk kan nihna leh kan tih apiang a ropuina tura ti tur kan nihna pawh aman min hriattir ang.

Tih tur hrang hrang kan nei a, chu kan mawhphurna chu ṭha taka kan tih chuan keimahni-ah Pathian a inpuang ang!

2 THESALONIKA 2:14 – ‘Chumi atân chuan kan Lalpa Isua Krista ropuina chang ve tûrin kan Chanchin Ṭha hril hmangin a ko che u a ni.’

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.