DIL RAWH U

MATHAIA 7:7
Dîl ula, pêk in ni ang; zawng ula, in hmu ang; kik ula, hawnsak in ni ang.

Jocelyn-i chu hna kal turin a insiam a, mahse a incheina aṭang chuan office hnathawk a ni tih pawh a hriat loh. Chhungkaw hausa tak an nih lem loh avangin thawmhnaw a nei ṭha lem lo. Office hna thawk mah nise a hlawh a tam lo a, a duh angin a fate a chawm ṭha thei lo va, hrehawm a ti thei hle a ni.

Natna a nei a, chu a natna chu zai a ngai a. Zaina tur pawisa a nei si lo a, a tuar tawp mai a ni. Nikhat chu a natna chu a tuar zo ta ngang lo a, a inentir ta a. Daktawr chuan Cancer a ni ang tih a hlau hle a, Jocelyn-i erawh chuan a inentirna man tur a nei daih lo ang tih a hlau hle thung. Mahse Daktawr chuan a thawhnaten an peksak vek tur thu a hrilh a, a natna chu zai turin an inti ta a ni.

Jocelyn-i zai anih dawn karah chuan a fapa, kum 11 mi chu natna khirhkhan tak mai neiin damdawi inah awm a ngai ta thut mai a. Daktawr chuan a inzai hun sawn a phal si lo va, a lungngai em em a ni.

A fapa chu damdawi in dangah a awm a, an inhlat em em mai si a. Vawikhat tal han biak a chak em em a, mahse telephone a awm si lo. Chu hmunah chuan mi thar mai an ni a, damdawi ina awmpui tur ṭhianṭha an nei bawk si lo a.

Jocelyn-i chu a ṭawngṭai ta a, “Lalpa, ka mal ngawih ngawih tunah hian, khawngaihin ka fapa ka biak theih nan min ṭanpui rawh” ti a. Daktawr-te hnenah a dinhmun a hrilh vek a, a awmna an sawn ta hlauh a, telephone awmna room-ah an dah ta a, a fapa nen chuan an inbe thei ta a ni. A va ropui em!

Tanpuitu mamawh vek kan ni. Pathian hnenah kan manganna lang takin i thlen ṭhin ang u. Ani chuan min ṭanpui dawn a ni. Lalpa chu fakin awm rawh se!

JOHANA 11:22 – “Tûnah pawh Pathian hnêna i dîl apiang Pathianin a pe ang che tih ka hria e,” a ti a.