NGHET TAKA VUAN

NGHET TAKA VUAN

SAM 16:11
Nunna kawng chu mi kawhhmuh a, Hlimna kim chu i bula awm a ni, I ding lamah chatuan nawmna a awm bawk si a.

Hmeichhe naupang pakhat hi a pa-in sakawr chungah chuan a zirtir dawn a. A chawi lawp a, a hma-ah ṭhut tirin sakawr chungah a chuan tir ve ta mai a. Hmeichhe naupang chuan a hlau em em a, a pa hnenah chuan ṭap ṭuau chungin, “Sakawr khalh ka thiam lo, vawikhatmah ka la ti ngai lo, engtin nge ka tih ang?” a ti a.

A pa chuan inringtawk tak leh thlamuan chungin, “Hlau reng reng suh, nghet takin min vuan tlat dawn nia!” a ti a ni.

‘Nghet takin min vuan tlat dawn nia’ tih chu zirtirna ṭha a va ni tak em!

Hmeichhe naupangin nghet taka a pa a vawn tlat chuan a pa’n khalh a zirtir thiam ang, chetsualna lakah a veng ang, chu hmeichhe naupang chuan khalh thiam lo mah se a pa a vawn tlat chuan a hlauhna a kiam ang a, thlamuang takin a awm bawk ang.

Chu hmeichhe naupangin nghet taka a pa a vawn avanga a hlauhna leh a ṭahna mittui a hul angin keini pawh Pathianin nghet takin amah vuan turin min ti a, amahah rinna nghat turin min ti a ni.

Ṭhenkhat chuan nghet taka vawn an duh a, mahse harsatna an tawk ṭhin. Nghet taka Pathian vuan tur chuan amah nena inpawl reng a ngai a, chu inpawlna nei reng tur chuan ṭawngṭai tam te, Bible chhiar tam te, inkhawm tam te a ngai a ni.

Ringtu, fianrial-a Pathian pawl ngai lo chu lawng, karna awm lo ang a ni a, Sava, thla nei lo ang a ni.

SAM 16:1 – Aw Pathian, i hnênah ka lo tlulût ta a, Min lo hum rawh.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy