ROPUI TAKA NGAMTU

ROPUI TAKA NGAMTU

ROM 8:37
Thei suh e! Chûng zawng zawngah chuan min hmangaihtu avângin ropui taka ngamtu kan ni.

Sipai pahnih, indona hmuna awmte aṭanga ṭhalaite fuihna ṭangkai tak an sawi ṭhin chu hetiang hi a ni:

Indona hmunah sipai pahnih, inṭhianṭha em em mai hi an awm a. Chu indona hmun aṭanga damkhawchhuah chu an duh ve ve a. Pakhat chuan an hmelma chu huaisen taka hmachhawnin a kap pawp pawp a, hmaichhanah a do a. Pakhat zawk chuan a thi ang tih a hlauh avangin lei laihkhuarah chuan a tawmim tlat mai a, silai mukhat pawh a kap per eih lo a ni. Vanneihthlak takin an pahnih chuan an damchhuak ta hlauh a.

Sipai pahnih chungchangah hian pakhat zawk chuan huaisen takin a hma-a thil awm chu a su a, pakhat zawk erawh chuan a su ngam ve lo tih kan hmu.

Mi zawng zawngin harsatna kan tawk a. Hmachhawn tur hun khirh tak kan nei fo. Mi zawng zawngin kan sukiang ngam kher lo a. Ṭhenkhat chu a chunga kan sawi angin an tlanchhe fo ṭhin.

Kan hma-a harsatna awm kan hmachhawn ngam loh hian harsatna kan sukiang tihna a ni lo. Nupa nunah pawh hian a ni, nupa an inṭhen hian an harsatna bo zo ta vekah an ngai a, mahse a nihna takah chuan harsatna an sutkian loh avanga inṭhen zawk an ni. Harsatna hmachhawn ngam loa kan awmna chuan harsatna lian zawk min siam zawk hial ṭhin a ni.

Khawvel-a harsatna awm thei hrang hrangte hmachhawn ngam turin hnehna neitu Pathian fate kan ni tih i hria ang u. Chung harsatna te chuan min tichak zawk ṭhin a, kan hel avangin mi chak, ngamtu kan ni tihna a ni lo ve.

Harsatna tawn ngam lo leh pehheltute chu mi dawihzep, Lal Isua ring ngam lotute an ni.

Buainaten min kalsan ang tih beiseia harsatna hmachhawn ngam lo chu, a chaklohna vanga tihbuaiin a awm tho ṭhin.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy