KHAWNGAIHNA MAK

EFESI 4:5
Nimahsela, Pathian khawngaihna chu a nasain, a mi hmangaihna chu a thûk êm a, kan bawhchhiatnate avânga thi kan nih lai khân Krista nên min tinung ta hlawm a. A khawngaihna avânga chhandam in ni.

John Newton-a hre lo chu mi tlemte an ni ang. Kum 1725 khan a lo piang a. A pa chu kristian sakhaw awih lotu a ni a, a nu erawh chu thlaraumi kan tih ang hi a ni thung.

A nu’n a boralsan khan a pa zuiin lawng khalhtu a ni a, a nun chuan sual kawng a zawh a, nawmsipbawlin a hun a hmang a, chutiang anih avang chuan bawih-a hralh a ni a, mi thuhnuaia hrehawm taka awmin a tlan chhuak a, lawng khalhna lamah eizawngin Captain a rawn ni leh a. West Indies leh America inkara sal hralhna kawngah thuk tak a inhnamhnawih nghe nghe a, chutianga nun bawraw tak nei chu a ni.

Kum 1748-ah Pathian khawngaihna mak a chungah a lang a, a rawn piangthar ta mai a. Chanchinṭha hrilin a hun a hmang ta thung a. Pathian hmangaihna a chungah a lang nasa em em a, ‘Khawngaihna mak mawi leh duhawm’ tih hla a lo phhuah chhuak ta hial a ni.

Pathian khawngaihna mak hian sual riangvai pawh a chhandam thei a ni.

EFESI 2:1-3-ah chuan, “Hmânah chuan in bawhchhiatnate leh in sualte avângin thi in ni a. Chutih lai chuan he khawvêl dân ang hian in khawsa a, boruaka thuneitute lal, awih lote chunga tûna thawk mêk thlarau thu thu-a in awm kha. An zîngah chuan keini pawh kan tel vek a, kan tisa châkzâwng ûmin kan tisa duhzâwng leh ngaihtuahzâwng kan ti ṭhîn a, mi dangte ang bawkin Pathian thinurna tuar tûr rênga piang kan nih kha.” tiin.

Chhandam kan nih hnu-a kan bawhchhiatna te kan hriat rengna khan Pathian khawngaihna ropuizia min hriattir ṭhin.