PATHIAN LEHKHA THU
2 TIMOTHEA 3:16
Pathian thâwkkhum Lehkha Thu zawng zawng hi intihdik nân te, insiamṭhat nân te, nun dân dik inzirtîr nân te a ṭangkai êm êm a ni.
Kristian pakhat, entlang (telescope) siam thiam deuh mai hi a awm a. Nikhat chu a thilsiam lai a chawl a, a chawlh hahdam pah chuan Bible a chhiar a, chutia a chhiar lai chuan Arsi chanchin zirmi, mithiam tak hian a rawn bia a, “Ṭhiana, i thil chhiar aṭang khan eng nge thil ṭha i besei a? Kan thil zirna aṭang leh kan thil chhuina zawng zawng aṭangin Bible hi thil hlui, hmana mi tawh, tunlaia awmze nei tawh lo a ni. A ziaktu pawh i hrechiang ngut em ni?” a rawn ti a.
Entlang siamthiampa chu a ngawi reng a. Arsi chanchin zirmi chu han en pahin, “Vansang Arsi chanchin zirmi, mithiam tak leh hre zau tak i ni a, thil tam tak i chhutna tura i calculator khawl i hman kha i hmang ṭangkai lo’vem ni?” a ti a. Vansang zirmi chuan, “Hmang ṭangkai tehreng e” tiin a chhang a.
Entlang siamtupa Chuan, “A siamchhuaktute i hria em?” tiin a zawt let a, Vansang zirmi chuan, “Hre kher lo ve, ka hriat a ṭul hleinem” a ti a.
“A nih leh engngatinge a siamtu hre si lo i hman duh reng tho ni?” a ti a. Ani chuan, “Kan ring a, hna tam tak min thawhsak a ni tih kan hria a lawm” tiin a chhang a. Entlang siamtu chuan, “Keini pawh kan Bible hi kan ring a, i calculator-in hna tam tak a thawh sak che angin thil ropui tak tak min tih sak ṭhin a ni” a ti a.
Hawh u, Bible hi i chhiar tam ang u. Kan ngaihzawngte lehkhathawn kan chhiar châk angin chhiar châk ila, kawng bo loh nana ram chin/ram lem (Road Map) kan râwn angin râwn ila, kan zirlaibu angin zir ila, sipaiten thupêk an zawm angin a thupêk i zawm ang u. Entlang siamtu tâna thil ropui tak tihsaktu Bible chuan keini pawh thil ropui tak min tihsak ngei ang.
JAKOBA 4:5 – Lehkha Thu-in, “Keimahnia a thlarau a dah hian min duh hliah hliah zia a entîr a ni,” a tih hi a sawi satliah mai niin in ring em ni?
