A TAKA NUNPUI

2 PETERA 1:20-21
‘Lehkha Thu-a hrilhlâwkna thute hi mahni ngaih dân maia hrilh fiah tûr a ni lo tih hre hmasa phawt ula, hrilhlâwkna rêng rêng hi mihring thu-a chhuak a ni si lo va, Thlarau Thianghlim hruaiin Pathian hnên ata an sawi zâwk ṭhîn a ni.’

Pathian thu hi a taka nunpui a harsa em em a. Mi tam tak Pathian thu sawi kan ei lohna chhan chu an nunah kan hmuh loh vang a ni, kan ti ṭhin.

Korea rama rawngbawlna hmun pakhata Pastor hmu turin hmun hla tak aṭangin vawikhat chu tlangval pakhat hi a rawn kal vang vang a. Pastor nen an inkawm chuan, a rawn kal chhante Pastor chuan a zawt a.

Chu tlangval Chuan, “Bible bung leh chang ṭhenkhat ka thiam thar a, chu chu rawn hrilh tur chein ka rawn pan che a ni” a ti a. Mel tam tak paltlanga rawn pantu chuan thu ropui tak engemaw a rawn neih a ring a. Mahse chu tlangval chuan Bible-a Lal Isua’n tlanga a thusawi chu a rawn sawi chhawng a, Pastor chu a hrilh a. A hlim em em a, thu dang erawh a nei lem lo.

Pastor Chuan, “Tlangval, a ropui hle mai, i Pathian thusawi zawng zawngte kha sermon ropui tak a ni. Mahse sawi mai duh tawk lo la, va kal ta la nunpui va tum ta che” a ti a.

Tlangval chuan, “Pastor, chu chu ka thiam dan ṭha ber a ni. Vawi tam tak zirthiam ka tum a, mahse ka thiam thei lo. Ka zir dan ka thlak ta a, a bung leh chang chhiar chungin kristian ni lo ka ṭhiante ka hrilh chhawng a, an chungah a takin ka lantir a, Pathianin mak takin hna a thawk a, chu thu chu ka thiam ta tiin ka rawn hrilh che a ni” tiin a chhang.

Gary Smith hnenah mipakhat hian Bible a chhiar zawh ngun tawh thu leh engmahin hna a thawh loh thu a hrilh a. Gary Smith chuan, “Pathian thu chuan nangmah kaltlang ve phawt sela, tichuan danglamna a awm ang”, tiin a chhang an ti.