MIDANG THATNA ZAWNG

1 KORINTH 10:24
Tu pawhin mahni ṭhatna tûr mai zawng lovin mi dang ṭhatna tûr zawng zâwk rawh se.

Lirnghing avangin loneitu pa pakhat chu tlâng pâwngah a tlan chho a, chulai chu buh hmun zâwl zau tak chuan a hual put mai a. Chutih lai tak chuan a piah lawka tuipui rawn ri hum hum chu a hria a, sakeibaknei rawn lim ang maiin vaukam lamah tui chu a rawn inbawh phei tup tup mai chu a hmu bawk a. Tuipui fâwn chuan a buh hmun leh an khawmite buh hmun chu a rawn chim vek dawnin a hmu a ni.

Chutih lai chuan a ṭhenawmten an buh hmunah hna an lo la thawk bawrh bawrh mai bawk si a. Engmah an hre ve lo tih a hria a, a awmna tlangah awm ve turin hriattir a tum ta a.

Engmah ngaihtuah hman lo chuan a buhkuang chhehkhawm chu a hâl ta chiam mai a. Tichuan an Temple dar chu a vaw ri ta chiam mai bawk a. A ṭhenawmte chuan a buh hmun a kang emaw tiin an tlan khawm a, mahse a lo kâng hauh si lo. An han hawi chhuak ta a le! Tuipui lian chuan an buh hmun chu a rawn chim ta hum hum mai a, an ui lutuk chu an chiau vawng vawng mai a, mahse an ngaihtuah chian erawh chuan loneitupa chuan an nunna hlu tak a chhanchhuak a ni tih an hre ta a ni.

Chumi-ni aṭang chuan an ṭhenawmte ṭhatna avangin nitinin ṭawngṭai turin Temple-ah chuan an kal ta ziah a ni.

Hetiang dinhmunah chiah hian ding ila chhanchhuah hna kan thawk ṭheuh ang. Mahse hetiang dinhmun chiah lo-ah pawh chhanchhuah hna emaw, midang tana thil ṭha tihna hna emaw, midangte ṭanpui theihna remchang tam tak a awm ṭhin.

Kan mihringpuite ṭhatna tur ngaihtuah ngai loh avangin hun tha leh remchang kan bawhpelh a tam hle. Chu chu thuhran ni se, remchang a awm avang chauhin ṭhatna lantir tur a ni lo a, khawi hmunah pawh, engtik lai pawhin kan lanchhuah tir tur a ni.

ROM 15:2 – Intihsâwt tawn nân mahni vêngte tilâwmin an tâna ṭha tih i tum ṭheuh vang u.