ENTAWN TLÂK

ENTAWN TLÂK

1 KORINTH 11:1
Keiin Krista ka entawn ang hian nangni pawhin mi entawn ve rawh u.

Nu pakhat hian a fanu hruaiin Gandhi bulah an rawn kal a. A harsatna chu a fanu chuan sweet thlum a heh em avangin chaw a ei mumal peih lo a, a hriselnain a tawrh phah vang mai mai a ni a.

Chu nu chuan Gandhi-a hnenah chuan a fanu in a thil chin ṭha lo chu a sim theihna turin zilh hau turin a ti a. Gandhi chu a ngawi reng a, thil tam sawi lovin chu nu hnenah chuan, “Chawlhkar thum hnu-ah i fanu hi rawn hruai leh ang che, tichuan ka lo zilh dawn nia” a ti a. Chumite nufa chu an haw leh ta rih phawt a ni.

Kar thum hnu chuan an rawn kir leh a. Gandhi chuan hmeichhe naupang chu a hruai hrang ta a, sweet ei ṭhat lohna leh a pawi theih dan te hrilhin ei tawh lo turin a ti a.

Chu nu chuan Gandhi-a hnenah chuan lawmthu a sawi pah chuan, “Ka hriat duh chu, Gandhi-ji, engatinge he thu hi kar thum liamta-a kan rawn kal khan i hrilh mai loh le?” a ti a.

Gandhi-a chuan, “Ni e, a dik khawp mai. Mahse keipawhin kar thum liamta khan Sweet thlum hmuam hi ka chin ṭhan, ka sim theih loh a ni a, tunah chuan ka sim tawh e” tiin a chhang.

Fate an ni emaw ni lo emaw, school-ah emaw Sunday school-ah emaw, pâwl-ah emaw eng thil-ah pawh midangte zirtir tur hian zirtirtu hi a tling tur a ni a, fihlimna turah fihlimin a zirtirna chu a hlawhtlin theih ngeina turin amah a inenfiah a pawimawh hle.

Kan tling lo kan ti fo, a dik e. Chu erawh chhuanlam lian berah kan hmang tur a ni hauh lo. Fate, zirlaite, member-te entawn leh zir tlâk ni turin theihtawp kan chhuah a pawimawh a, a bak tlin lohna chu Pathianin a ropuina turin a hnawhkhat tawh ang.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.