LUNGNGAIHNA

2 KORINTH 7:10
Pathian duhzâwng anga lungngaihna hian chhandamna tûra simna a thlen a, inchhîrawm lo tak a ni. Mihring taka lungngaihna erawh chuan thihna a thlen ṭhîn a ni.

Vawikhat chu Setana hian sualna hmanruate chu hralh a tum a. A ho-te chuan a hmanraw hrang hrangte chu a rawn la chhuak a. A man an tar thliah thluah a. Chung zingah chuan rilru chhiatna te, huatna te, itsikna te, chapona te, duhawmna te pawh a tel a ni.

An han rem an han rem hnu chuan a sirah chuan hmanraw hlui tak, sawi bim bem, puanchhia-a tuam hi a awm ve a. Mahse thildangte ai chuan a man a sang a. A ho-te chuan Setana hnenah chuan eng nge a nih an zawt a, a dangte aia a man a to chhante an zawt a.

Setana chuan, “Lunghnualna (Discouragement) a nih kha” a ti a. A hote chuan, “A man a va sang bik ve?” an ti a.

Setana chuan, “Lunghnualna te, lungngaihna te hi ka hmanraw ṭangkai berte an ni. Lunghnualna leh lungngaihna hmang chuan mihringte thinlungah, an chhia leh ṭha hriatna-ah ka lut thei tlat a ni. Hmanraw dangte ai chuan awlsam takin ka lut thei a ni. An lungngaih lai leh an lunghnual laia an chhia leh ṭha hriatna-a ka luh fuh tawh chuan ka duh ang thalin ka sawngbawl thei tawh a. Ka hman rim em avangin a dangte ai khan a hlui hmel a nih kha.” tiin a chhang a.

Lungngaihna avangin Pathian-ah lawmthu kan sawi thei lo fo ṭhin a, Pathian kan fak thei lo ṭhin. Chu chu Setana lawmna ber a ni. Ṭahna ruamah pawh Lalpa-ah lawm fo turin Paul-a chuan min hrilh kha.

FILIPI 4:4 – Lalpaah chuan lâwm fo rawh u, ka sawi nawn leh ṭhîn ang, lâwm rawh u.