I THUSAWI I ZAWM EM

MATHAIA 7:21
“‘Lalpa, Lalpa,’ mi ti nazawng chu vânramah an lût lo vang a, ka Pa vâna mi duhzâwng titute erawh chu an lût ang.

Rawngbawltu tawn hriat ngah tawh tak pakhat hi a awm a. Parish Mission field an tih hmunah kum 50 lai mai thuhril hna a thawk tawh a ni. Zan khat chu mumang a nei a. A mumangah chuan rangkachak tûala kawngkhar mawi tak chu a kik a;

Mithianghlim Petera chuan lo chhângin, “Tu’nge ni?” a ti a. “Fr. Clyde ka ni a, kum 50 lai mission ramah thuhriltu ka ni a” tiin a chhâng a. Petera chuan, “A ni maw, Pu Clyde, mahse tunah rih chuan helai hmuna i lo kal ka la remti lo a. Thih hnu-a sual tenau kan faina hremhmunah thla thum i awm phawt a ngai dawn a ni” tiin a lo chhâng a.

Pu Clyde-a chuan, “Thla thum maw?! Australia ramah kum tam tak thuhrilin ka awm tawh a, eng nge ka la thawh ngai awm?” a ti a. Petera chuan, “Pu Clyde, engmah i thawh ngai a awm tawh lo e, ṭhutna nuam tak a awm a, chutah chuan i ṭhu ang a, i thuhril (sermon) zawng zawng chu i ngaihthlâk a ngai a ni. A zavaiin kan lo record vek a, zing chhûn zanin i ngaithla dawn nia.” a ti a. Pu Clyde-a chu a harh chiang hle a ni.

Pu Clyde-a mumangah khan Petera’n ama thusawi a ngaihthlâk tir na chhan khan awmzia thûk tak a nei.

Thuhril rawngbâwl hi rawngbâwlna pawimawh berte zing ami a ni a. Lal Isua pawhin a dam laiin thuhril hmangin hmun hrang hrangah rawng a bâwl a. Chu chu vawiin thlengin kan la chhawm nûng zel a ni.

Chutih lai chuan thuhriltu ṭha tak tak leh thusawi thiam tak takte hian an thusawi hi anmahni ngeiin an zâwm em? tih hi zawhna pawimawh tak a ni a. Thusawi ṭha tak tak, sermon ṭha tak tak mahni thusawi zawm si lo rawngbâwltu a awm theih a, chung zingah chuan keini ngei pawh kan tel thei a ni tih hriain insiamṭhat ngaihna laiah insiamṭha zel ang u.