KRISTIAN LEH SETANA

JOHANA 4:23
Nimahsela, a hun a thleng dâwn, tûnah pawh a thleng tawh mêk, Pathian chibai bûktu tak takten thlarau leh thutakin Pa chibai an bûk tawh ang. Chutiang mi chu Pain amah chibai bûk tûrin a zawng a ni.

Vawi khat chu Setana hian Kristian a cho a, “Eng nge kei aia i tih ṭhat han sawi teh?” a ti a.

Kristian-a chuan, “Nang aia ka ṭhatna chu kan inkhâwm ṭhîn a, nang erawh chu i inkhâwm ngai lo,” tiin a chhâng a.

Setana chuan, “Teuh lo mai, i hre sual a ni. Inkhâwmna-ah chuan tumah in thlen hmain ka thleng daih tawh ṭhîn,” a ti a.

Kristiana chuan, “Ka ṭawngṭai ṭhîn tih i hre lo em ni?” a ti leh a. Setana chuan, “I hriat atâna ṭha chu, ṭawngṭai inkhâwm ka hmaih ngai lo tih i hre dawn nia. Mi tam tak rilru ka la pêng fo a ni,” a ti leh a. Kristiana chuan, “Damdawi inah ka kal a, ṭanpui ngaite ka ṭanpui ṭhîn,” a ti leh a. Setana chuan, “Damdawi inah chuan ka mi leh sa hliamtuar dam lo tam tak an awm avângin ka awmpui reng ṭhîn,” a ti leh a.

Kristiana chuan, “Kâr khatah vawi khat chaw ngheiin ka ṭawngṭai ṭhîn,” a ti leh a. Setana chuan, “Kâr khatah vawi khat chaw ngheia i ṭawngṭai ṭhîn anih chuan kei erawh ni tin ka ṭawngṭai ṭhîn a. Eng nge sawi tur i la neih le!” a ti a.

Kristian chuan sawi tûr a vân ta khawp mai a. A han ngaihtuah leh vang vang hnu chuan harsa ti takin a nihna zawng zawng mualpho pui khawpin ti hian a ti a, “Thlarau Thianghlim ṭanpuinain mahni ka inphatsana, rinawm takin ka Lal Isua Krista hnung ka zui asin.” tiin Kristiana chuan mittui tla zawih zawih chungin a rawn sawi chhuak a. Setana chuan chhân dân tûr a hre ta lo a, a kalsan ta a.

Lal Isua hnung zui tak tak tûr hian mahni inphatsan a va pawimawh tak êm. Kan duh zâwng ni lovin Lal Isua duh zâwng, kan tuina zâwng ni lovin Lal Isua tuina zâwng ni zêl sela. Eng pawh tiin thawkin khawiah pawh awm mah ila Lal Isua lâwmna tûrin nun hman ṭheuh i tum ang u.

TITA 1:16 – Pathian hriaah an inngai a; mahse, an thiltihin a zir si lo; mi luhlul leh ngeiawm tak an ni a, thil ṭha eng atân mah an tlâktlai tawh lo.