RAWNGBAWLNA HLEN
2 TIMOTHEA 4:5
Nang zawng engkimah inthunun la, tuar fan fan rawh; Chanchin Ṭha hril hna hi thawk zêl la, i rawngbâwl hna kha hlen rawh.
Hringnun kan hman dan leh kan nun dan kawngah mithiamte chuan thil pawimawh pathum; ‘Three Pillars of Pedagogical Development‘ a awm an ti a. Chu mi awmzia chu ‘Nun kawng dik zawh tura inzirtirna laimu pathum‘ tihna a ni ang.
Chu thil pathum chu a indawt danin hetiang hi a ni:
(i) Chhungkua (Family),
(ii) Sikul (School) ,
(iii) Ṭhalai rawngbâwlna (Youth Work/Ministry) te an ni.
Hetiang hian sawifiah ila kan hrethiam awm e.
Miin chhungkuaah nunkawng kaihhruaina a hmuh tawh loh chuan Sikul zirtirtu a la nei thei a, sikul zirtirtute kaihhruainaah a hlawhchham zel chuan ṭhalai rawngbawltute (Youth Worker) lakah a la nei thei fo a, ṭhalai rawngbawltute hruaina a hlawhchham leh phei chuan nun kawng dika hruaitu tur a nei tawh lo hiala ngaih a ni.
Chuvang chuan ṭhalai rawngbawltute hi chu beidawng lova an mei chelh fan fan tura dah pawimawh an ni. Youth Worker-te hlawhchhamna leh hlawhtlinna hian chhungkaw inthlahchhawngin chhuan thar a siam zêl tur leh Kohhran ban lo ding tur leh Ram leh hnam inrelbawlna lo piang tur thlengin nghawng thûk tak a nei tlat a, an pawimawh takzet a ni.
Mithiamten ‘Three Pillars of Pedagogical Development’ an tih zingah hian khawi emaw berah chuan mawhphurna kan nei ngei ang le. Kan mawhphurna zâwn ṭheuhah theihtâwp i chhuah ang u. Thihna leh nunna inkâra awmte nun chhanchhuahna tura inhlanna a ni tiin, lêt leh beisei lova kan nun kan thâp a ngai ve ta.
Thih thlengin rinawmin lo awm rawh, tichuan nunna lallukhum ka pe ang che.
2 Comments
John Doe
tha lutuk
Becky
amen