MAHNI INHLAN

ROM 5:8
Amaherawhchu, Pathianin min hmangaihzia a lanna chu – mi sual kan nih reng laiin Krista kan tân zu thi a!

Midangte chunga ṭhatna lantir hi a hlu takzet. Malsawm dawnna a ni. Mahse chânna tel lova induhsakna emaw ṭhatna lantîr hi a hlu hranpa lo. Fapa tam tak aṭanga tu emaw ber rawn tîr lovin fapa mal neih chhun liau liau a rawn tirh avangin Pa Pathian min hmangaihna chu a hlu takzet a nih tih kan hriat kha. Chutiang rilru chu pu ve turin min ti a ni.

Pathian thu-ah chuan tihian kan hmu, “Krista Isua rilru ang hi nangni pawhin pu zêl rawh u. Ani chu Pathian anpui ni mah sela, Pathian tluka awm chu tum tlat tûrah a ngai lo va, mahni intitlâwmin bawihah a insiam a, mihringa lo piangin mihring a lo ni ngei na a, a inngaitlâwm a, thi khawp hialin thu a zâwm a, krawsah a thi ta a.” – FILIPI 2:5-8.

American mi thawnthu tawi ziak thiam, O. Henry-a khan hetiang hian Krismas thawnthu a ziak:

Krismas present in pe tawn duh nupate kha an retheih êm avangin pêk tur ṭha an nei lo ve ve a. Mahse an pahnih chuan tumah inhrilh tawn lovin an neih hlu ber chu hralh a, thil in leisak an tum a. Hmeichhia chuan a sam mawi tak, rangkachak rawng a chhuan em em chu sam siamna dâwrah a hralh a, a pasal tân sana hrui rangkachak-a luan a leisak ta a.

Mipa pawh chu sana dâwrah kalin a sana ṭha tak chu a hralh a, a nupui sam mawi tak khuihna tur Samkhuih nalh leh changkang tak a leisak ta a.

Krismas a lo thlen chuan an han in-present ta a, sam khuih tur a awm tawh lo a, sana hrui lahin awmzia a nei tawh hek lo, hlutna an nei tawh lo. Mahse thilpêk a zawnga hlu ber anmahni ngei an inpe ani tih an hrechhuak a. Lâwm avangin an inkuaha an ṭap dun ta kauh kauh mai a. Hmangaihna tak tak zâwk chu an chhar chhuak ta a ni.

1 KORINTH 10:24 – Tu pawhin mahni ṭhatna tûr mai zawng lovin mi dang ṭhatna tûr zawng zâwk rawh se.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy