ZAN THIANG REH

ISAIA 9:6
Kan tân nau a lo piang a, Fapa min pe ta a. Sawrkârna chu a kovah a innghat a, A hmingah chuan: Remruattua, Maka, Pathian Chaka, Chatuan Pa, Remna Lal an ti ang.

Kum 180 liam taah khan hla pakhat chu Austria rama thingtlang khaw pakhata Biak inah an phuah a. Chu St. Nicholas Church inkhawm zawh hnu lama la chambang mi tlemte te chuan Midnight Mass an nei a. An lung a leng êm êm mai a, hla chi hrang hrang an sakte chuan Lal Isua lo pian hun atana an inbuatsaihnaah an thinlung a fan chhuak hlawm a, chungte chu duh tâwk mai lovin chu zan thiang reh takah anmahni-a ênna lo lang chu puanchhuah an châk a, an chung siar êngte thlîr chungin Lal thar chibai turin Bethlehem kawng chu thlarauvin an zawh a.

An zingah chuan Asst. Pastor Fr. Joseph Mohr a awm ve bawk a, chupa chuan chu zan thianghlim hun tawngte theihnghilh theih tawh loh tur leh khawvel mite pawhin an hriat reng turin, nau thianghlim, ngilnei leh zaidam aṭanga chhuak ang tak zelin ‘Silent night, Holy night, all is calm, all is bright’ tih hla a rawn phuah ta a ni.

Joseph Mohr-a chuan Franz Gruber-a hnenah hlân chhâwngin ani chuan mawi takin a thlûk pawh a lo siam zawh sak a. Ṭawng 100 chuanga lehlin a ni tawh a, Rome-ah phei chuan maktaduai tam takin Krismas hun lai vel hian an sa ṭhin an ti a ni. Chu mai a ni lo va, film siamtu tam tak chuan ‘Silent Night’ hla lo chhuahna lam hawiin film an siam ṭhin bawk.

He hla phuahna hi a rei tawh avangin a lo chhuah dan hi sawi a inang lo ve viau a. Joseph Mohr-a kutchhuak ngei chu a ni a, Franz Gruber-a siamsak a ni bawk a, kum 1818 krismas laia a phuah ngei a ni bawk. Mizo ṭawngin Pu Lalmama (1901-1959) chuan min lehlin sak a, Kristian hlabu mai bakah hlabu tam takah a serh zinga a mei ang a ni a, krismas hla lâr berte zinga mi a ni.

Zân thiang reh lai takin,
Enna a lo thleng ta;
Hrâite rawn chawi, chûn nunnêmin,
Nau thianghlim ngilnei leh zaidam;
Remna Lal Fa chu.