PATHIAN NGAIHSAK THLAHTU

SAM 4:3
Pathian ngaihsak mi chu Lalpan a tân a thlang tih hria ula, Lalpa chuan ka au aw hi a lo hria a.

Tu leh fa neia Pathian malsawmna dawng mi tam tak an awm a. Kan ramah ngei pawh chutiang mi chu an awm ṭeuh a ni. Pathian ṭih chhûngkuate chu an dingchhuak ṭhin a. Pathian zah lo chhungkua chu an tluchhe ṭhin a ni.

John Mott-a an tih hian vawi khat chu South Africa rama missionary chhûngkua Andrew Murray-a te chanchin leh an thlahte chanchin a chhui a. Fa 11 an nei a. A fapa 5 te chu minister (kohhran) an ni a, a fanu 4 te chu minister nupui an ni.

A tu leh fate aṭanga ṭhangthar rawn chhuak a chhui zêlnaah chuan a tuchhuan zinga 10 lai mai chu minister an ni a. Mi 13 te chu missionary an ni bawk. Hei hian min hriattir chu Pathian ṭih tak tak chhûngkua, kristian chhûngkua an nih vâng a ni.

A.T. Pierson an tih chuan a zirchianna aṭangin hetiang hian report a pe bawk, “Chhungkaw 1200 inthlahchhâwn dân zir chian a ni a. Heng zînga 400 lai chu an kehdarh a. Chhûngkaw 310 te chu in leh lo nei lova kutdawh an ni a. 60 te chu rûkrûk chîng an ni a, 7 te chu inrikrapna leh tualthattute an ni. Chhûngkaw 1200 aṭang chuan 10 chauhte chu mahni in leh lo dina khawsa thei an ni,” a ti.

Khawvêl hausakna leh ropuina avânga Pathian kan ngaihsak lo anih chuan kan la boral dâwn a ni. Joba 8:13-ah chuan ti hian kan hmu, “Pathian pawisa lote chu chutiang chuan an awm ang a, Pathian ngaihsak lote chu an beidawng ang.” tiin.

Lalpan leilung luahkhat tûrin min ti a. Mahse a duh loh zâwnga kan awm a, amah kan ngaihsak si loh chuan chhiatna kan chungah a la thleng ngei ang.

MALAKIA 2:15 – Pathian mi, fa ṭha tak tak hring tûrin’ a ni.